تبرأت المُمثلة المصرية حلا شيحة، من فيلم "مش أنا"، الذي يُعرض في دور العرض حالياً، بعد ساعات من طرح كليب "بحبك" -ضمن أحداث الفيلم- عبر موقع يوتيوب.
وأثارت شيحة، جدلاً واسعاً، بعدما كتبت منشوراً عبر موقع "إنستغرام"، أبدت فيه غضبها الشديد من طرح كليب "بحبك" والذي يجمع مشاهد من فيلم "مش أنا".
وأشارت إلى أن تامر حسني، خالف وعوده لها، بشأن هذا الفيلم، حسبما قالت، متابعة: "أكد لي أنه سيحترم رغبتي، وبعض الطلبات التي طلبتها منه بكل احترام وود، خلال الصيف الماضي".
وترى شيحة، أنّ الفيلم لم يُحقق نجاحاً وفقاً لمعاييرها، قائلة: "يمكن نجحنا بمقايس الدنيا، بس صدقوني بمقايس ربنا إحنا لم ولن ننجح.. أنا عارفة ومتأكدة إن زملائي جواهم خير.. بس للأسف فتنة الشهرة والنجاح مش بتخلينا نشوف ونقيس الأمور صح".
نوبة بكاء
وكشفت شيحة عن دخولها في نوبة بكاء، بعد طرح الكليب، مبررة ذلك بقولها: "عيطت لأني شفت نفسي في المشاهد دي.. دي كانت ذلة، نتيجة ظروف مريت بيها وكلنا بنغلط ولازم نغلط علشان إحنا بشر".
وعن اعتزالها عالم الفن، قالت: "أنا تبت من المشاهد دي، وهي لا تصح، وأهم حاجة إن ربنا يرضى عني؛ لأن في الآخر ده اللي هينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص.. إحنا كلنا عندنا امتحان في الدنيا دي".
ووجهت شيحة، رسالة إلى الفنان تامر حسني، قائلة: "أحب أفكرك بالفيديو ده يا تامر اللي قلت فيه أنا مش بتمنى أموت وأنا مطرب.. أنا دايماً خايف من كده.. كلام أكيد قولته في لحظة صدق جواك وجوانا كلنا".
وطالبت تامر حسني، بقولها: "شوف الفيديو ده تاني، يمكن يفكرك إن جواك أكيد في صراع.. كلنا بنغلط بس المهم في الآخر نتدارك الغلط و نصلح.. يا سلام لو أصواتنا ومواهبنا كلها نستعملها في الخير عشان يبقى فن بجد".
تهرب من فريق العمل
تامر حسني، استنكر رد فعل حلا شيحة، تجاه الكليب، مؤكداً أنه لم يُقدم لها وعداً قط، بحجب هذا الفيديو.
وكتب منشوراً، عبر موقع فيسبوك، قائلاً: "أنا احترمت كلامي معاكي ووعدتك أحذف مشاهد تانية طلبتيها وحذفتها بالفعل، وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف، أو كلميه يبعتهالك كلها موجودة".
وأضاف: "الفيلم بقاله 3 أسابيع في السينمات والكليب موجود جوة الفيلم.. هو بالنسبة لك الحرام إننا ننزل الكليب على يوتيوب بس.. إنما الكليب يتشاف جوه السينمات عادي؟ منطق غريب فعلاً يا حلا".
وتساءل بقوله: "مش أنتي اللي مضيتي عقد وتقاضيتي عليه مبلغ كبير عشان الدور ده بعينه! هو مش إنتي اللي صورتيه ومثلتيه بنفسك وبمنتهى الرضا ولا حد أجبرك؟!".
وأشار إلى تهربها من صُناع الفيلم، لعدم استكمال دورها، بداية من تركيب الصوت، وتصوير الملصق الإعلاني (الأفيش)، قائلاً: "للأسف يا حلا متعاملتيش صح مع الموقف، كان لازم تهتمي بأمرك أكتر من كده، ولو كان ليكي أي طلب تاني كنت هعمله بكل حب".
وقال إن طرح الكليب يأتي ضمن الخطة التسويقية للفيلم، كما هو مُعتاد، وهذه أمور يُدركها الفنانون كافة، حيث أبدى دهشته: "ده كليب رومانسي، يعني معقول كنتي عايزة المنتج يحذف كل مشاهدك اللي صورتيها من الكليب ويطلعني بغني وبقول الكلام الرومانسي ده للأستاذ ماجد الكدواني مثلاً، هو ده يُعقل؟!".
وأضاف: "أنا زعلان منك جداً يا حلا، على مفردات البوست بتاعك غير الموفقة، ومستحيل هرد بطريقتك اللي فيها تجريح واتهامات باطلة ليا، احتراماً لحاجات كتير يمكن فايتاكي، بس مش هتفوتني".
